الإهداء إلى مُصابتي بيروت وإلى سائر الدم الذي نثر رذاذه على شتلة بقائها.
كتبتُها بالعاميّة .. لأن حبر القلب في لحظة الفجع أقرب !
عن جد.. مرقِت سِني؟
وشوشني يا صوت القهر .. قِلّي
قتلوا العروس ؟ خطفوا الدِني؟
جاوني .. وما تتأخّر
ويا حروف الوفا .. حدّها ضَلّي
توابيت عم بتفوح .. وعيون عم بتنوح
وقلبك يا وطني..
لا مات ولا فِني
روحي يا غيمة موت .. عن قلبنا فِلّي
بيروت.. عرس كبير
بيروت.. عم تصلّي
غيبي يا عتمة آآآآخ .. موتي
حكاية أمل ..
قلوبنا مِحتلّي
هالبكرا الجايي يمكن مجروح ..
هالقلب العاشقك يمكن مدبوح..
بس الحب أقوى..
وبكرا بصُدر الأمل ..
رح ترجعي تغلّي
بيروت ..
يا طِرحة عيد عحداد ما بتِلبَق
ما تخلّي الحزن
يخزّق أمانينا
وما تتركي العتمة .. النور
تسبَق
قومي يا بيروت نغنّي
أغانينا ..
ولا مرة قدر الموت
بحبر القلب ..
يِغرَق
قومي عضَو القمر ..
رقّصي المقهور
قدرِك شمسنا تِبقِي
وزلغوطة حلوة ..
تزفّنا ..
وتنادينا
