همسات لبيروت – بعد ما كان الصبح يتغنى بطلعتي
ساح عرقي الندي ونخسف بدري
بشرعة عدل البشر دمي نهدر
وبحكمو الآسي الردي صدر نحري
بموت ناعم خصري الحلو تزنّر
وبغنج المكر نقللي ميلي وتمخطري
ومن فرط الوجع مِلت ميلة المدبوح
وطيف رسمي الزهي شفتو بقبري
بإيد مدمَمّي لمست جسمي الجريح
ونِحت وصاح عمقي بصمت وافَجري
بغبرة لهيبو الحارقه لجنون هالانفجار
فضا جوي الوسيع ندفن ببحري
وبمدى هَولو العنيف وجِّي نمسح
وبأذى شوكو المخيف نجدل شَعري
وانهالت دموعي الحزيني مداد حبال
قزازاتا الجارحة سهام جمار بصدري
وترامت ضلوعي العليلي ميال نبال
ريشاتا السارحة رماح حجار بضهري
وراجت فييّ أرض هالدني كلاّ
والدم بوجدان الألم طبع ذكري
ومن حزنو الفرح لملم بعِبّو الطّري
رنات لحنو الشّجي ورتمى بجَمري
يا هياكل الاهراءات: عِنّي عن بيروت شو بتروي وبتذكري
عن وأدة حلم … عن رقدة جسم … عن همدة نجم
عن وقدة حزن… عن دمعة جفن… عن فقدة حضن
عن بيت دافي كان فيه ّننسج عمري
يا هياكل الاهراءات بوحي وعن سرّك علني ولهَدِم رمز مجدك موجي وثأري
يا هياكل الاهراءات قومي وعن شَعرِك سدِلي ولجرح حزن أهلك نوحي وفجِري
يا عنّة المفجوع … يا أنِّة الموجوع
يا حسرة المفقود … يا صرخة المولود
يا شكوة المظلوم… يا بكوة المحروم
لِك مين شاف قهر متل قهري
