عبير بسام غزال – رغم التخويف رغم الترهيب رغم الأضداد والشعارات ورح نشارك من هون وما في جدوى من هونيك.
ايه نزلت.. ويمكن عيلتي زعلت مني ويمكن كون خاطرت وانا مسؤولة تجاهم وتجاه نفسي بس ما كنت قادرة غير ما انزل… خلونا نولد بحرب ما نعرف من اي ملجأ لملجأ نروح، خذلونا بعد ثورة اعتبرتها جامعة بتقول مع قناعتي انه لبنان أولاً ونصهم فيها كانوا عّم بغطوا على حاكمينا فعلياً اليوم او ساهموا بإفقارنا مع غيرهم من حلف الممانعة التابع الي هني وياهم نهبونا… هدّونا.. جردونا من كل سبل العيش.
ايه نزلت.. دخلكم كان في غير حل!!
كان فينا بعد نسكت ع الذل… عُمَري فوق الأربعين واشتغلت من الفجر لنجر وانطحنت لوصّلت ابني الكبير لمكان افضل من المزرعة الي عايشين فيها بس ما عرفت ربّي ايه ما عرفت ربّي… للأسف… طلع وطني وما بيؤمن بتفرقة اسمها دين ولا مذهب غير لبنان العظيم.. … شي بضحك ما هيك!!! شي بوجع ما هيك!!! بالوقت الي الناس عّم تحلم تروح على بلد أي بلد بيحترم فيه الإنسان وكرامته.. ابني ناطر المطار ليفتح ليرجع من الأرض الموعودة كندا للأرض الملعونة لبنان… جبل الصوّان… بلد أرز الرب الي اغتصبوها بالطول والعرض…
ارجاع يا ماما… ارجاع عيش قناعاتك وطبق مبادءك لأن هيدا اللي كبرت للأسف عليه ومش قادرة عارضك فيه…
طب والحل؟!!!
بموت من القهر… بنظّر من ورا شاشة… ساحة بتشبهني أو ساحة ما بتلبقلي… الله يخليكم عطوني حلّ…
إيه نزلت… نزلت لأصرخ وصارع بإيديي واسناني ليصير وطن أجمل لولادي… مش المهم نحنا لأن بدل ما نكون عّم نروح صوب تحقيق حياة كريمة بعد نحت اكتر من ٢٠ سنة بلا رصيد او ضمان لشيخوختنا الجاية ومتلي متايل يمكن ٤٠ سنة او خمسين او ناس عّم بتروح وفيها ما حاسين وأكيد مع وجع اكبر وطحن للروح اكبر وقصص اكتر بتروي كل الأسى الي ما بينتسى …
طب ليه.. ليه الي زرعناه ما منحصده… ليه الشريف بالشارع بده يتبهدل والمجرم الفاسد ببرجه معزز مكرم… ليه مبارح بدنا نركض من مطرح لمطرح ونتخبى من القوى الأمنية الي هي ولادنا الي عّم يكملوا فيها مسرحيتهم الهزيلة ولادنا الي عّم ترمي علينا قنابل مسيلة للدموع ناسية انه ما بقى يفرق شي مع القلب الموجوع والانسان المطحون..
بس للأمانة مشهدية هزتني من جوا ونحن كنّا سلميين واكتر من صوت مش رافعين… مشهدية بضّحك اكتر.. بتبكي اكتر… ما بعرف… الي بعرفوا انه ايه الي متلي بغنى عنها واريحلوا يقعد ببيته يترقب ويتحسر بس عطوني حل تاني وانا مستعدة..
ايه نزلت… وتبهدلت ولولا الناس الطيبة بشارع الجميزة الي خبونا جوا بيتهم مع ست كبيرة محجبة -كانت رح تختنق من دخان قمع الناس الي كل ذنبهم انهم عّم ينتفضوا- برمزية بتشهد انه لأ بعد فيه أمل.. ايه بهالكم لبناني الطيب بعد في أمل… بهالكم واحد اللا طائفي بعد فيه أمل… بهالكم ثائر بضميره ووطنيته بعد في أمل..
مش مقبول ننكسر اكتر ما كسرونا…
ايه نزلت ورح ضَل انزل على قد ما فيي وبحلم ببلد بيشبهني وبصون ولادي من بعدي..
ورح ضلّ احلم لأن هيدا الشي الوحيد الي بعد منا ما قدروا يسرقوا…
